વોટ્સએપ ગ્રુપની મગજમારી ~ Vahivancha Barot Samaj

મોબાઈલ મહાગઠબંધન ઊર્ફે વોટ્સએપ ગ્રુપની મગજમારી

હસુભાઈ વોટ્સએપ નામની બલાથી દૂર જ હતા, પણ એક દિવસ અચાનક અમારી ડીમલાઈટ સોસાયટીના સભ્યોએ “મેમ્બર્સ ચેમ્બર” નામનું વોટ્સએપ ગ્રુપ બનાવ્યું અને હસુભાઈને એમાં એડ કરવામાં આવ્યા. હસુભાઈએ મને એડ કર્યો. એમાં રોજ સવારે ધનશંકર થોકબંધ સુવિચાર મૂકતા અને રોજ રાતે બાબુ બાટલી થોકબંધ જોક્સ મૂકતા. જોકે આની એકમેકને અસર થતી નહીં. કેમ કે સુવિચારનો મારો ચાલતો હોય ત્યારે વહેલી સવારે બાબુ બાટલી સૂતો હોય અને જોક્સનો મારો ચાલતો હોય ત્યારે મોડી રાતે ધનશંકર સૂતા હોય.

વોટ્સએપ પર સોસાયટીના સભ્યોનું બે પ્રકારનું અંગ્રેજી જોવા મળતું, એક ધરાર ખોટું અંગ્રેજી અને બીજું ધરાર કોપી પેસ્ટ કરેલું સાચું અંગ્રેજી. મને સંબોધીને શાયરીઓ મોકલવામાં આવતી. ‘આ તમને ક્યાંક પોગ્રામમાં બોલવામાં કામ લાગશે’ કહીને અમુક સભ્યો સ્વરચિત કવિતા મોકલતા. જો કે ઘણીવાર ચારચાર જણાની સ્વરચિત કવિતા એકસરખી આવતી.

ધીરેધીરે હસુભાઈને ગ્રુપ બનાવવાનો ચસ્કો લાગ્યો. એમણે પોતાના સ્કૂલ કાળના મિત્રોનું ગ્રુપ બનાવવા માંડ્યું, જેઓ બાલમંદિરમાં સાથે ભણતા તેઓનું ‘બાલમંદિર બ્રિગેડિયર’ ગ્રુપ બન્યું, જેઓ સ્કૂલમાં સાથે હતા એમનું ‘આઉટ સ્ટેંડીંગ સ્ટુડટ્સ’ગ્રુપ બનાવ્યું. (અર્થાત કાયમ ક્લાસની બહાર ઊભા હોય એવા વિદ્યાર્theeo, પરણેલાઓનું એક ગ્રુપ બનાવ્યું, એને નામ આપ્યું, ‘યારા સમદુખિયારા’.

સોસાયટીના ફ્લેટ હોલ્ડર્સના ‘મેમ્બર્સ ચેમ્બર’ગ્રુપમાં સોસાયટીની બહેનોને એડ કરવામાં ન આવ્યા એટલે રોષે ભરાઈને હેમાબેને ‘કૂક- ડે- કૂક’ગ્રૂપ બનાવ્યું. એમાં રોજ સવારે બહેનો એક્બીજીને પૂછતી,“આજે શું બનાવ્યું?” બધા પહેલો જવાબ એ આપતાં “રોજ ને રોજ શું બનાવવાનું?” પછી તો એનું શોર્ટ ફોર્મ પ્રચલિત થઈ ગયું, “આર એન આર એસ બી!” પછી હેમાબેન લખે, “લેફ્ટ ઓવર” (બચેલું) અથવા “લેફ્ટ ઓન વર” અર્થાત વર પર છોડ્યું. (રસોઈ પસંદ કરવાનું કે રસોઈ બનાવવાનું તે સૌએ પોતાની રીતે સમજવું). કોઈ એક લખતી કે“ગોઈંગ આઉટ ફોર ડીનર” અને બાકીના ‘નર’ને ઘોંચપરોણા શરૂ થઈ જતાં.

બીજું બહેનોએ “કામવાળી લાઈવ સ્ટેટસ”નામનું ગ્રુપ બનાવ્યું. કામવાળી મંજુ પાંચ ફ્લેટમાં કામ કરતી. સૌથી પહેલાં રમાબેનને ત્યાં આવે,એટલે રમાબેન અપડેટ કરે, “મંજુ મહારાણી અરાઈવ્ડ હાફ અવર લેટ”. પછી દસ વાગ્યે જાસ્મીનબેન એમને મેસેજ કરે “અલી રમા, સેંડ હર અર્લી.” જાસ્મીનનું ઘર છોડે એટલે જાસ્મીન સામેના એપાર્ટમેંટ પરથી મેસેજ લખે, “@હેમાબેન,મંજુ મહારાણી લેફ્ટ” હેમાબેન માથુ ખંજવાળતું સ્માઈલી મૂકે. “નોટ અરાઈવ્ડ યેટ” એટલે ઉપરના માળેથી ચંપાબેન લખે, “વોચિંગ ફ્રોમ બાલ્કની,બેનબા ઈઝ on the way”. એટલે હેમાબેન ત્રીજા માળે કામ કરતી વોચમેનની વાઈફની શેઠાણી શાંતાબેનને લખે “સેંડ યોર મેઈડ ટુ બાલ્કની "આખરે કામવાળીએ જિદ કરી કે કાં તો મને ગ્રુપમાં એડ કરો કાં આખું ગ્રુપ ડિલિટ કરો.

એટેંશન સીકીંગ શાંતિભાઈએ સોસાયટીના પોતાનું “શાંતિભાઈ ફેન્સ એંડ ફોલોઅર્સ” ગ્રુપ બનાવ્યું અને તમામ 33 ફ્લેટ હોલ્ડરને એડ કરી દીધા. એટલે બાબુ બાટલી અને ધનશંકરે પણ પોતાનું “ફેન્સ એંડ ફોલોઅર્સ” ગ્રુપ બનાવ્યું. ધીરેધીરે સોસાયટીના દરેક સભ્ય એ પોતાનું “ફેન્સ એંડ ફોલોઅર્સ” ગ્રુપ બનાવી દીધું. દરેક્માં 33 સભ્યો હતા, કોઈ કોઈને શરમમાં ના ન પાડી શકે. ગ્રુપમાંથી નીકળી જાય એટલે ખોટું લાગે. કોઈપણ નવો મેસેજ ફરતો થાય એટલે દરેક પોતાના ગ્રુપમાં મૂકી દેતો અને બાકીના બત્રીસને નોટિફિકેશનની ઘંટી વાગતી.

આખરે હસુભાઈ હિંમત કરીને “કાન્ટ હેંડલ સો મેની ગ્રુપ્સ” કરીને બધા ગ્રુપમાંથી નીકળી ગયા. એમને જોઈ હું પણ બધાં ગ્રુપમાંથી નીકળી ગયો, પણ ઘણાં દિવસોથી મિનિટે મિનિટે નોટીફિકેશન જોવાની ટેવ પડેલી તે હવે સૂનુ સૂનું લાગવા માંડ્યું.

આખરે હસુભાઈએ પોતે ‘ડીમલાઈટ સોસાયટી ઈંટેલિજંટ મેમ્બર ચેમ્બર’ ગ્રુપ બનાવ્યું. એમાં અમે બે જ છીએ. અમને બન્નેને લાગે છે ગ્રુપનું નામ 50 ટકા તો સાચુ જ છે. હસુભાઈ એ ગ્રુપમાં આખા જગતને ગાળો આપે એટલે મેં કંટાળીને લખ્યું, “નખ્ખોદ જજો કોઉમ અને બ્રાયન એક્ટન નામના માણસોનું!” (કેમ કે, વોટ્સએપની શોધ (કે સ્થાપના) કોઉમ અને બ્રાયન એક્ટન નામના માણસોએ કરી હતી.)

આ જાણીને હસુભાઈ બોલ્યા, “મોદીજી ઝુકરબર્ગને મળ્યા એના બદલે મોદીજીએ આ બન્નેને મળીને કહેવું હતું કે સ્પેશ્યલ કેસ તરીકે 125 કરોડ દેશવાસીઓને એડ કરી શકાય એવું “મન કી બાત”નામનું ગ્રુપ બનાવી આપે. એકસાથે એક્સો પચ્ચીસ કરોડ નોટીફિકેશન સંભળાય એટલે બાજુમાં પાકિસ્તાનવાળાને લાગે કે અણુબોમ્બ ફૂટ્યો!”

- ભદ્રેશભાઈ બારોટ (Whatsapp)